අප ලෝකය තාක්ෂණික දියුණුව අතින් හිණි පෙත්තටම ළඟා වී ඇතැයි බොහෝ අය ප්‍රකාශ කළත් එය එසේ නොවේ. වෙනත් ඉතා දියුණු ලෝක වල ශිෂ්ටාචාර හා සසඳන කළ හිණි පෙත්තක් පේන මානයේවත් නොමැත. අප තවමත් සිටින්නේ ඉතා ප්‍රාථමික මට්ටමකය.
අප තාක්ෂණයේ දුර්වලතා සහ දියුණු විය යුතු අංග
ගමනාගමනය හා ප්‍රවාහනය
ගමනාගමනය හා ප්‍රවාහනය ගත් කළ අප තවමත් සිටින්නේ ඉතා මන්දගාමී අවස්ථාවකය. සාමාන්‍ය මෝටර් රථයක වේගය 500කීමී/පැ ඉක්ම නොයයි. අඩුම තරමින් 100000කීමී/පැ වේගයක් තිබුණානම් සෑහීමකට පත්වන්නට තිබුණි. තවද අප තවමත් ඉන්ධන ලෙස භාවිත කරන්නේ බොරතෙල්ය. අඩුම තරමින් න්‍යෂ්ටික ශක්තියවත් භාවිත නොකරයි. අනෙක් කාරණය නම් රිය දෙකක් ගැටුණු විට රිය දෙකට පමණක් නොව එහි සිටින මගීන්ටද හානි වෙයි. මෙසේ සිදුවිය යුතුද? රිය දෙක ළං වන විට ගැටීම වැළක්වීම සඳහා චතුර්මාන තාක්ෂණය භාවිත නොකරන්නේ ඇයි? තවද චතුර්මාන තාක්ෂණය භාවිතා කිරීමෙන් වාහන වලට එකක් හරහා තව එකක් යා හැකි බැවින් වාහන තදබදයද වැළැක්විය හැකිය. අනෙක් කාරණය නම් රථවාහන වලට ගමන් කළ හැක්කේ පැතලි පෘෂ්ඨයක් මත පමණි. අහසේ පාවීමට පොළොව තුළ කිමිදීමට නොහැක. එයද තාක්ෂණයේ අති විශාල අඩුපාඩුවකි.
අභ්‍යවකාශ තරණය ගත් කළ අපට තවමත් හැකිව ඇත්තේ සඳ හා අඟහරු තරණය කිරීමට පමණි. ආලෝකයේ වේගය ඉක්මවා යෑම කෙසේ වෙතත් එය ආසන්නයට පවා යාමට නොහැකි වී ඇත. තවද අප තවමත් අභ්‍යවකාශය තරණය කරන්නේ රොකට්ටු වල ආධාරයෙනි. තනිව ගමන් කළ හැකි අභ්‍යවකාශ යානා තවම නිපදවා නොමැත.
අනෙක් කාරණය නම් තවම අප ප්‍රවාහනය යනුවෙන් අදහස් කරන්නේ අවකාශය තුළ එහා මෙහා යෑමක් ගැන පමණි. කාල තරණයක් ගැන සිතාවත් නොමැත. අප තාක්ෂණය මගින් කාල තරණයක් හෝ කිරීමට නොහැකිනම් එය කොතරම් අඩුපාඩුවක්ද?
තොරතුරු හා සන්නිවේදනය
තොරතුරු හා සන්නිවේදනය ගත් කළද අප සිටින්නේ ඉතා ප්‍රාථමික අවස්ථාවකය. අපට තවම හැකිව ඇත්තේ රූපය හා ශබ්දය සන්නිවේදනය කිරීමට පමණි. ගන්ධය, රස හා ස්පර්ශය සන්නිවේදනය කිරීමට තවමත් නොහැකි වී ඇත. රූපය ගත් කළද තවම සන්නිවේදනය කළ හැකිව ඇත්තේ ද්විමාන රූප පමණි. ත්‍රිමාන අවකාශයේ යමක් මවා පෙන්වීමට තවමත් නොහැකි වී ඇත. ටෙලිවිෂනයේ රූප පෙනෙන නමුත් සුවඳ හෝ රසක් නොදැනෙයි. එම රූප අල්ලා බැලීමටද නොහැක. අනෙක් කාරණය නම් මුළු රටටම පෙනෙන්නේ එකම රූපයය. එකම ශබ්දය. ටෙලිවිෂනය හරහා අපට සන්නිවේදනය කිරීමට, අදහස් හුවමාරු කිරීමට නොහැක. එමගින් අපට අවශ්‍ය දේ නොලැබෙයි. උදාහරණයක් ලෙස ප්‍රවෘත්ති විකාශයේදී අප අසන ප්‍රශ්න වලට පිළිතුරු ලබා දිය හැකි කෘත්‍රීම බුද්ධියක් නොමැත. තවද ටෙලිනාට්‍ය වල රඟපාන නළුවන්ගේ හා වැඩසටහන් වල නිවේදකයන්ගේ මනසේ ස්වභාවය හා සිතුවිලි අපට නොදැනෙයි. මෙයද තවත් අඩුපාඩුවකි.
තවත් කාරණයක් නම් අපට තවමත් සිතුවිලි මගින් සන්නිවේදය කළ නොහැකි වීමයි. තවමත් සිතුවිලි මගින් මෘදුකාංග අතුරු මුහුණත්, වෙබ් පිටු ආදිය පාලනය කළ නොහැක.
අප සන්නිවේදනයේ තවත් දුර්වලතාවක් වන්නේ වෙනස් ජාතීන් දෙකක පුද්ගලයින් දෙදෙනෙකුට එකිනෙකා හා අදහස් හුවමාරු කරගැනීමේ අපහසුතාවයයි. හඬ පරිවර්තනය කළ හැකි උපකරණ තවමත් නිපදවා නොමැත.
අනෙක් ප්‍රධාන දුර්වලතාවක් නම් අප සන්නිවේදනය ආලෝකයේ වේගය ඉක්ම නොයාමයි. මෙනිසා අපට දුරස්ථ ග්‍රහලෝක සමඟ සන්නිවේදනයේදී දුෂ්කරතා රැසකට මුහුණ දීමට සිදුවේ.
තවද අප තවමත් සන්නිවේදනය සඳහා භාවිත කරන්නේ ඉහළම තාක්ෂණික අංගයක් ලෙස ජංගම දුරකථනය පමණි. මොළය හා සවිකල හැකි නැනෝ චිප්ස් තවමත් නිපදවා නොමැත.
ආහාර හා සෞඛ්‍යය
ආහාර හා සෞඛ්‍ය අතින්ද අප සිටින්නේ ඉතා නොදියුණු අවධියකය. අපට එදිනෙදා අවශ්‍ය පෝෂණ ද්‍රව්‍ය මැනීමට හැකි උපකරණයක් තවම නිෂ්පාදනය කර නොමැත. අපට අවශ්‍ය ආහාරය සැනෙකින් මැවිය හැකි තාක්ෂණයක් තවම නැත. ඉලෙක්ට්‍රොනික හා සූර්ය ශක්තියෙන් අප ශරීරය පවත්වාගෙන යා හැකි තාක්ෂණයක් තවම නැත. ශරීරයේ අපද්‍රව්‍ය ස්වයංක්‍රීයව ඉවත් කළ හැකි තාක්ෂණයක් තවම නැත. ලෙඩ රෝග හා වයිරස වලින් බේරී සිටීමට හැකි තාක්ෂණයක් තවම නැත. පිළිකා, වයිරස් රෝග, හෘදය හා විවිධ අවයව වල රෝග තත්ත්වයන් ක්ෂණයෙන් සුවපත් කළ හැකි යන්ත්‍ර තවම නිපදවා නොමැත. සිරුර නොසිදුරු කර ශල්‍යකර්ම සිදුකළ හැකි තාක්ෂණයක් තවම නැත.
නිවාස හා ගොඩනැගිලි
නිවාස හා ගොඩනැගිලි ගත් කළ අපගේ යටිතල පහසුකම් තවම ඇත්තේ ඉතා ප්‍රථමික මට්ටමකය. තවම අප ගොඩනැගිලි නිර්මාණය කරන්නේ යකඩ හා සිමෙන්ති වලිනි. අඩුම තරමින් නැනෝ තාක්ෂණයවත් භාවිත නොකරයි. අහස් යානයක් ගැටුණු විට පවා ගොඩනැගිලි කඩා වැටෙයි. ඒවා එතරම්වත් ශක්තිමත් නොවෙයි. නම්‍යශීලී නොවෙයි. තවද කිලෝමීටර් ගණන් උස ගොඩනැගිලි තවම සාදා නොමැත. ගොඩනැගිලි අහසේ පා කළ හැකි ප්‍රති ගුරුත්ව තාක්ෂණය තවමත් භාවිත නොකරයි. අනෙක් කාරණය නම් තවම බිත්ති හරහා ගමන් කිරීමට නොහැකි වීමයි. චතුර්මාන, පංචමාන, ෂඩ්මාන ආදී තාක්ෂණයන් තවම භාවිතා නොකරයි. ගොඩනැගිලි සැම විටම ද්‍රව්‍යමය අවස්ථාවක් දරයි. තරංගයක් ලෙස හැසිරී ක්ෂණයෙන් තමාගේ ස්ථානය වෙනස් කිරීමට තවම නොහැකි වී ඇත. කාමර එකක් තුළ එකක් ලෙස සමාන්තරව නිර්මාණය කිරීමට තවමත් නොහැකි වී ඇත. කාල අවකාශ දොරටු තවම නිර්මාණය කර නොමැත. ක්ෂණයෙන් ගොඩනැගිලි හා නිවාස වල හැඩය, වර්ණය ආදී දෑ වෙනස් කිරීමට තවම නොහැකි වී ඇත.
මෙපමණක් නොව අනෙකුත් අංග සියල්ලෙන්ම අප සිටින්නේ ඉතාමත් ප්‍රාථමික අවස්ථාවකය. මම මෙය ලියන්නේ නැති දේ ගැන සිහින මැවීමට නොවෙයි. අප කෙසේ හෝ අපගේ තාක්ෂණය දියුණු කළ යුතුයි. නව සොයාගැනීම් සිදුකළ යුතුයි. නව ශිෂ්ටාචාරයක් බිහිකළ යුතුයි.
